ومن الجيران ما قتل !!

انهارده الجمعة اول يوم أجازة ليا و يتوالى بعده يومين أجازة تانين هارتاح فيهم من الكلية والمحاضرات ياااااااه الساعات الأخيرة من مساء الخميس بتبقى بالنسبة لى ساعات الهدوء والسكينة لانى راجعة تعبانة من الكلية وبالتالى مش هأقدر أعمل أى حاجة وتانى يوم أجازة يعنى ممكن أئنتخ أدام التليفزيون من غير ما ضميرى يؤنبنى وكمان عشان" يزيد النعيم اللى انت فيه يا قلبى "هأنام براحتى لحد أما أصحى لوحدى بجد دى قمة المتعة بالنسبة لى إنى اترحم من رن منبه موبايلى المستفز اللى بينزل دق على دماغى زى الشاكوش ....بعد ما خلصت شئونى الاداريةامبارح من أكل وصلاة والذى منه جريت على حبيبى الاوحد سريرى وقمت مستخبية تحت البطانية وشغلت mbc2"إعلان ده وألا إيه ما علينا"وقعدت اتفرج على فيلم أجنبى هو صحيح مكنش توب بس مش مشكلة المهم انى استمتع بممارسة الفعل نفسه وفى هذه الأثناء دخل بابا أوتتى ولقانى متنحة ادام التليفزيون وعنيا تصارع النوم وحالتى حالة ضحك على منظرى طبعا ومش فاكرة قال لى إيه بالظبط بس فحواه يعنى :"شكلك تعبان وبرضه بتعذبى نفسك وبتتفرجى على التليفزيون! "وبعدين استسلمت لسلطان النوم ومفوقتش من سلطانه غير الساعة عشرة الصبح بس إيه قمت دماغى تقيلة وودنى وجعانى وشعرى منعكش ... بالعربىكده كنت زى البدر فى نص الشهر العربى بالظبط!!فطرت وبرضه قعدت أدام التليفزيون ومش عارفة افوق ومش عارف ايه سر الأريفة اللى بتحصل لى يوم الجمعة دى ...المهم فضلت على هذا الحال حتى رن جرس الباب راحت ماما قالت لى :يا إيناااااااس افتحى

قمت ألم شعرى عشان لو جالنا ضيوف ميتخضوش ...بس فى الوقت ده ماما فتحت ويا ريتها ما فتحت مطلعش ضيوف ولا حاجة دى ...دى طونط أم بسمة ...جارتنا !!

طونط أم بسمة دى عبارة عن سيدة فى أوائل الثلاثينات ولكن وزنها يفوق التسعينات والسر فى السمنة البلدى والأكل المسبك اللى متعودة عليه "لأنها من الفلاحين "عشان كده تلاقيها خبيثة وحيشرية وكلمانجية .

ماما :اهلا اهلا ازييك يا بوسى اتفضلى

طونط :ازييك يا أم طارق

ودخلتا حجرة الصالون ....

ماما :صوبى لطنط عصير يا إينااااااس

ورحت زى الشاطرة على المطبخ صبيت لها العصير "وعلى فكرة كان إنجوى مانجو كمان"ورحت أقدمه للشابة عشان نرييحووووها

ودخلت أوتتى تانى ولكنى عمالة أسمع صوتهم وهم بيتكلموا وطنط حيشرية عمالة تحشر مناخيرها فى اللى ملهاش فيه وتسأل على أحوالنا ووأخبارنا وأهرامنا وأنا متغاظة نفسى أقول لماما هى مالها ...يا ماما يا ماما طب بلاش تقول لها على الموضوع الفلانى هى مالها مهو انتهى خلاص وألا هو حب النكد ده طبيعى فى الشعب المصرى !!

كل الرغى بتاعها كوم واللى سمعته وأنا معدّية فى الصالة كوم تانى طونط قالتـ :أصل إيناس مش من العيال اللى لافة ودايرة كده ومدلّعة ......

يعنى من الأخر أنا بت كوكو أتباس واتحط جنب الحيط ومش بعرف اتصرف ومش متودكة والكلام بتاع الستات ده

أنا سمعت الكلام ده من هنا وخطر ببالى خاطرشرير انى ادخلها واقولها :والله يا طونط انا سمعت حضرتك بتقولى اسمى هو فى حاجة عاوزة تقوليهالى ؟؟؟

وبعدين طردت هذا الخاطر من دماغى شر طردة وقولت لنفسى ما تقول اللى تقوله وانا يهمنى رأيها فى إيه ؟ إذا كانت ماما مريّحة دماغها وبتهاودها وخلاص أتحشر أنا فى الكلام وأبقى أنسة حيشرية زييها

وبعد شوية انزاحت الغمة وانقشع الضباب وزادت نسبة الاكسجين فى بيتنا لما طونط انصرفت سالمة غانمة لبيتها

بقى أنا بسكوتة يا طونط حيشرية!!

هو صحيح بابا مدّلعنى فعلا لأنى بّنوته الوحيدة وصحيح كمان أنا مبعرفش أطبخ "إلأ الحاجات الخفيفة يعنى "ومن الوهلة الاولى قد يخدعك وجهى البيبى فيس وهزارى وضحكى مع الناس لدرجة انك متتخيلش انى ممكن اتنرفز واتخانق او اعمل مشاكل "بس انت ضايقنى وانت تشوف!! " بس ده ميخلنيش كوكوووووووووو

لأنى والحمد لله ساعة الجد يعتمد عليا وده مش كلامى أنا ده كلام بابا وماما كماااااان.

هه ..يبقى انتى مالك يا ولية يا حيشرية ماتخليكى فى بيتك وروحى اعملى لقمة لعيالك عشان يكلبظوا ويربربوا اكتر واكتر لحد أما نعملهم باب عمارة مخصوص يدخلوا منه !!

قطيعة محدش بيرتاح من جيرانه بالساهل !!