إليكم نشرة الأخبار ...
وحشتونى كتييييييييير ....بجد بقالى كتير مكتبتش حاجة معلش بقى استحملوا أصل البيسبيسجيرل اللى زى حالاتى وقتها ضيق هتعمل إيه وإالا ايه ؟؟؟.....سامعة حد بيتريق ..وكمان حد بتهمنى بالألاطة ......لا والنعمة ان شاء الله يا رب النت عندى يفصل والجهاز يضرب وتخترقه السى أى إيه إن كنت أليطة .....
المهم بعد المقدمة المستفزة "اللى هى ضرورية عشان تحسوا إنى جيت "أنا انهاردة مبسوطة أوى من حاجتين :
أولهما :انى dslوصل حدانا يا بوى وهأعرف أرمح على الشبكة العنكبوتية براحتى بدل التصفح السحلفى اللى كنت بأعمله بأنام جنبه !!
وثانيهما:ان انهاردة فى محاضرة مذيع ومقدم برامج اللى بتديهالناالمذيعة أسامة سيد "هى اسمها كده ومش عاوزة تريقة"وهى مادة عملى على فكرة يعنى بنعمل فيها مذيعين سواء قارئ نشرة كاره حياته أو مذيعة برنامج منوعات مايصة أو مذيعة برنامج ثقافى معقدة وهكذا .....
قمت انهاردة وعملت فيها مذيعة النشرة اللى كارها نفسها "على أد مقدر يعنى رسمت الجدية "ومسكت المايك "وقريت خبر ادام جحافل الدفعة اللى كانت تسن أسنانها لتعلقنى أقصد تعلق على قرأتى بعد ما أخلص
انا مسكت المايك قبل كده وطبعا هو ليه هيبة كده متعرفش ليه؟ بس أول مرة امسكه وألقى كمذيعة..كنتى خايفة ؟اه طبعا كنت خايفة شوية بس من أول لما قمت من مكانى لحد ما طلعت على الاستيدج كنت عمالة اقول لنفسى هتقولى كويس ...هتقولى كويس وفعلا ....الاوغاد اللى قاموا يعلقوا على قرأتى قالوا إن صوتى حلو بس ...."متخدوش فى بالكوا بعض الملاحظات "وأ/أسامة قالت لى صوتك حلو وآداءك حلو بس ...."يا جماعة ملا حظة عابرة "بس كنت حاسة انلى مبسوطة اوى وانا نازلة من على الاستيدج وانا اقلب عينى على عيون دفعتى العزيزة .....كانت اول مرة اكون فيها مذيعة على الملأ وكنت محتاجة فعلا إن حد متخصص يقولى إيه رأيه فيا كمذيعة واسمع ملاحظاته على صوتى وأدائى عشان أتأكد إنى على الرايت تراك زى ما بيقولوا
انا عارفة طبعا انكوا نفسكوا تستمتعوا بجمال صوتى حاااااااااااااضر "إحم إحم إحم "بأسلكه اهوه "والنبى حد يعمل كوباية ينسون أو تيلو
أعزائى المشاهدين أهلا بيكوا معانا فى حلقة جديدة من برنامجكوا .....
فى إيه مش سامعين ؟؟؟
متزعلوش إن شاء الله فى يوم من الأيام صوتى هيوصل لكوا بس أوعى ساعتها تغيروا المحطة .
هناك 10 تعليقات:
هاااااااي ازيك انا كنت عاوزه اقولك لا متخفيش انشاء الله تكوني مذيعه كبيره في المقام مش السن وانا اوعدك لو شوفتك في التليفزيون -وده اكيد صعب علشان الحجاب - مش هحول التليفزيون بس ممكن اقفله
ههههههههههههههههههه
ايه الحلاوة دى!!...ايناس بقت مذيعة!يا خسارة فاتتنى الحلقة دى ,بس طبعا متخيلاكى...الموضوع حلو قوى ودمه خفيف,مبروك على الdsl,و مستنية ااخر اخبارك. يويو
بسي بأه من الاخر عشان انا كمان بسنس مان بس مش زيك طبعا يعني ممكن ألاقي وقت أقرا تعليقك المهم انشاء الله تكوني مذيعة جامدة جدا جدا بس ابعدي عن نشرة الاخبار اه ياه كنت هانسي ممكن نفكر مع كل المدونين ونعمل مؤتمرنا الاول فين أكيد هيكون في مركز الرسالة وأيه مركز الرسالة ؟ ايه الاسئلة الكتير دي زوري مدونتي وأنتي تعرفي سلام عشان مش فاضي
"حب"ى منورة بس كده برضه بتقوليها فى وشى لو شوفتك فى التليفزيون وده صعب !!وكمااااااااان هتقفليه
يا بت اتعلمى النفاق شوية ممكن ينفعك
pizzaro
يويو معلش الحلقات جاية كتير بس انتى ابقى تابعى
واحد مثقف
منور يا بيسبيس مان ومتشكرة اوى انك خصصت ليا جزء من وقتك الثمين وهنيالك يا فاعل الخير والثواب "وش بيضحك "
دمك خفيف يا نوسة
وربنا معاكى ويفوقك فى شغلك مستقبلا
آية صادق
أشكرك يا نوس علي التعليق والاهتمام بالرد بس أنا يا جمعة بفكر في حاجة مهمة جدا وهي (مؤتمر المدونين الاول ويارب يكون قريبا جدا وأتمني أن تساعوا علي أن يتم المؤتمر
اولا مبروك على ال دي اس ال
ثانياً ربنا يوفقك ان شاء الله و تبقى حاجه كويسه
تحياتي
لا يا توتة انتي احلى مذيعة في العالم.. دي مش مجاملة عشان انتي صاحبتي.. لأ دي حقيقة بس ابعدي عن نشرات الاخبار اللة يكرمك:)
و يا رب كدة نتجمع انا و انتي خلف ميكروفون واحد.. او حتى قدام كاميرا واحدة بس بشرط نكون قاعدين.. عشان مايبانش الفرق بينا؛)
مش عايزة افسر اكتر من كدة
مبروك على دى اس ال يانوسة وعقبال ما تؤدى احسن واحسن فى امتحان غادة باذن الله .. وبجد نفسى اتفرج علينا ومستنية اليوم دا بفارغ الصبر
فرحتلك يا نوسه انتى قدها بجد وإن شاء الله تقدرى تحققى احلامك بس بلاش نشوفك على القنوات الفضائية أو الأرضية:)لأ بهزر فين ماتكونى حنفتح التلفزيون ، ومبروك على dsl عشان نقدر نتواصل مع بعض بدل ماانتى بتدخلى أوف لاين
zada
إرسال تعليق